الرز بلبن على الطريقة المصرية

الرز بلبن مفيش احلي من كده

المقادير:

كيلو لبن مش مغلي
نصف كوب رز
2 معلقه كبيره قشطه بلدي ( اختياري )
2 معلقه كبيره نشا
2 معلقة كبيره كريم شانتيه ( اختياري)
8 معالق كبيرة سكر او حسب الرغبه
فانيليا

الطريقة:

غسلت الرز ونزلت بيه في حلة وعليه مياه تغطيه واول لما المياه غليت هديت عليه وسيبته يستوي ويتشرب المياه بعدها نزلت عليه باللبن

واهم حاجه عشان الوش يطلع كده اللبن ميكونش مغلي خالص انا جبته من اللبان وفضيته زي مهو من الكيس علي الحله

ولما ابتدا اللبن يسخن نزلت بالسكر والكريم شانتيه والقشطه ودوبتهم كويس

ولما ابتدا يغلي دوبت النشا في شوية مياه صغيرين ونزلت بيهم علي اللبن وطبعا ده كله مع التقليب المستمر

ولما يربط هنزل بالفانيليا اخر حاجه واسيبه يغلي كويس دقيقتين تلاته واغرفه في الاطباق

ولما برد تماما غطيته كويس باسترتش ودخلته التلاجه كام ساعه هيطلع الوش بالكرمشه دي

ولو عايزينه فرن زي الطاجن بندخله الفرن تحت الشوايه بس ياخد وش ولما يبرد برضو بنغطيه وندخله التلاجه